कञ्चनपुर । महाकाली नदीमा आएको बाढीले कञ्चनपुरको भीमदत्त नगरपालिका र दोधारा–चाँदनी नगरपालिकालाई जोड्ने झोलुङ्गे पुलको एक भाग भत्काएर बगाएको छ।
बुधबार बिहान करिब ८ बजेतिर महाकाली नदीमा आएको तीव्र बाढीका कारण पुलको नदीको बीच भागमा रहेको पिलर भत्किएपछि पुलको एक भाग नदीमा खसेको हो।
प्रहरीका अनुसार भीमदत्त नगरपालिका–१३ तर्फबाट छैटौँ र दोधारा–चाँदनीतर्फबाट तेस्रो नम्बरको पिलर भत्किएको छ। पिलर भत्किएसँगै त्यसमा जोडिएको पुलको संरचना नदीमा खसेको प्रहरीले जनाएको छ।
महाकाली नदीमा पछिल्लो समय पानीको बहाव बढेसँगै पुलका पिलरमाथि तीव्र दबाब परेको स्थानीयको भनाइ छ। बाढीको बहावले नदीको धार परिवर्तन हुनुका साथै पुलको आधार क्षेत्रमा कटानसमेत बढाएको बताइएको छ।
पुलको एक भाग भत्किएपछि दोधारा–चाँदनी र भीमदत्ततर्फको पैदल आवतजावत प्रभावित भएको छ। स्थानीयवासीका लागि नदी वारपार गर्ने महत्वपूर्ण माध्यमका रूपमा रहेको उक्त पुलमा क्षति पुगेपछि दैनिक आवतजावतमा समस्या उत्पन्न भएको छ।
घटनापछि सुरक्षाकर्मीले पुल आसपासको क्षेत्रमा निगरानी बढाएका छन्। भत्किएको पुलको अवस्था तथा थप क्षतिको सम्भावनाबारे सम्बन्धित निकायले स्थलगत निरीक्षण गर्ने तयारी गरेको जनाइएको छ।
महाकालीमा बाढीको बहाव अझै तीव्र रहेकाले पुलको बाँकी संरचनासमेत जोखिममा पर्न सक्ने भन्दै स्थानीयलाई सावधानी अपनाउन आग्रह गरिएको छ।
पुलको कुन भागमा कति क्षति भयो र तत्काल आवतजावतका लागि वैकल्पिक व्यवस्था के गर्ने भन्ने विषयमा सम्बन्धित निकायको थप विवरण आउन बाँकी छ।
