काठमाडौँ । रसुवाको भोटेकोशी नदीमा आएको बाढीबाट भएको क्षतिको पछिल्लो विवरण नेपाल प्रहरीले सार्वजनिक गरेको छ। शनिबार अपराह्न ४ बजेसम्मको विवरणअनुसार बाढी तथा त्यसबाट प्रभावित क्षेत्रमा हालसम्म ६ सय ६९ वटा शव फेला परेका छन्।
नेपाल प्रहरीका अनुसार सबैभन्दा धेरै चितवनमा २४८ वटा शव फेला परेका छन्। यस्तै नवलपरासी पूर्वमा १५८, नवलपरासी पश्चिममा ७५, गोरखामा ५४, धादिङमा ४९, नुवाकोटमा ४१, तनहुँमा ३१ र रसुवामा १३ वटा शव फेला परेका छन्।
बाढी प्रभावित क्षेत्रमा खोज तथा उद्धार कार्यलाई तीव्रता दिन ४ हजार ८ सय ५४ जना प्रहरी कर्मचारी परिचालन गरिएको प्रहरीले जनाएको छ। विपद्का क्रममा २७ जना प्रहरी कर्मचारीसमेत हालसम्म सम्पर्कविहीन रहेका छन्।
यसैगरी बाढीमा परी घाइते भएका तथा विभिन्न स्थानबाट उद्धार गरिएका व्यक्तिको सङ्ख्या २ हजार ३ सय ७१ पुगेको छ। उद्धार गरिएकामध्ये रसुवाबाट ६ सय ७६, नुवाकोटबाट १ हजार ६ सय २२ र धादिङबाट ३ जना रहेका छन्।
नेपाल प्रहरीका अनुसार काठमाडौँ उपत्यकाका विभिन्न अस्पतालमा उपचाररत तथा उपचारपछि डिस्चार्ज भएका घाइतेको सङ्ख्या १४० रहेको छ।
बाढी प्रभावित क्षेत्रमा अझै खोज तथा उद्धार कार्य जारी रहेको प्रहरीले जनाएको छ।
